‘O CASTIELLO E TU

 

Quanta logge stasera chiene ‘e gente !

Se sperdono p’ ’o cielo tanta voce,

resate e suone. Tutte so’ cuntente.

Ncopp’ ‘o Castiello sta allummata ‘a Croce.

 

E tu addò staie ? Quant’anne so’ passate ?

So’ passate tant’anne ‘a chella sera !

Giuvenuttielle, stéveme appuiate,

felice e spensierate, a na ringhiera,

 

e guardàveme ‘o ffuoco ca saglieva,

pe’ na scusa… accussì… pe’ fa vedè…

E ogne bomb aca ncielo s’arapeva

cchiù t’accustave azzicco azzicco a me.

 

E mo addò staie ? Sacci ca si’ sincera:

saccio ca ogne anno ‘o core tuie sta ccà,

mmiezo ‘a festa ‘e Castiello; e ‘e chella sera

saccio can un te può mai cchiù scurdà.

 

Niente cchiù veco: nu velario rosa

mo tengo nnanze a ll’uocchie; niente cchiù

veco, e mme gira attuorno tuttecosa:

for’a ‘sta loggia ce stai sulo tu.

 

Pecchè, ncopp’ ‘o Castiello, sulamente

veco ‘a Croce allummata ? Ma pecchè

for’ a ‘sta loggia, mmiezo a tanta gente,

stasera veco sulamente a te ?

 

N’OMBRA SI’ TU

 

N’ombra si’ tu:

n’ombra stanca d’ ‘a vita,

can un mm’abbandona mai cchiù.

Si’ n’ombra,

e nun siente l’ammore,

nun siente dulore,

nun siente nemmeno

‘a voce ‘e chest’anema afflitta;

si’ n’ombra, e nun siente

cchiù niente.

 

Ma tu…

Tu si’ n’ombra scuntenta,

e te resta

sultanto na cosa:

na freva ‘e vendetta, pussenta;

e pe’ tte

‘a vendetta è na festa;

pecchesto, vendetta facenno,

t’ ‘a piglie cu’ me

nun vulenno.

 

Embè, tu si’ n’ombra ? E i’ pure

So’ stanco d’ ‘a vita:

pur’io mo so’ n’ombra, e cammino,

cammino, cammino

p’ ‘e strate cchiù scure

d’ ‘o munno,

e te stongo vicino.

 

MARE NFAME

 

Mare lucente, mare arricamato,

tu raccugliste’o primmo sio suspiro

d’ammore; e ‘a tanno nu destino niro

pe’ tutt’ ‘a vita mm’ ha perseguitato.

 

E stu destino, niro comm’ è ‘o funno

tuoio, mare nfame ca tradisce e accide,

tu mme ll’hé dato , e mo tu te ne ride

ca mme vide sbattuto pe’ sto munno.

 

Doppo tantu cammino so’ turnato

Ncopp’ ‘a stessa banchina ‘e chella sera:

‘o posto è ‘o stesso, è ‘a stessa ‘sta scugliera,

tutto è comm’era, niente s’è cagnato.

 

Nun mumurià, cu’ st’ onne traditore !

Io saccio che vuo’ di’: ca so’ venuto

cu’ n’ata, chesta sera… Embè, sperduto

mme sento, comm’a tanno, int’a st’ammore.

 

Sulo mme pare ca stu core è n’ato:

nun è cchiù chillo ‘e primma ‘e stu  cammino;

po’ tutto è ‘o stesso: è ‘o stesso stu destino…

e tu si’ ‘o stesso mare scellerato.