Senza cugnomme

 

Che pena ca sarria

si stisse ‘e casa faccefronte a me !

T’affacciarrisse pe’ te fa’ vedè ?

- Buongiorno, onna Lucì ! – te diciarria...

 

Eggià !  P’ ‘o munno si’ «donna Lucia

de Rosa in Gambardella».

Ma pe’ me, nonzignore, tu si’ chella

ca i’ voglio bene e ca vo’ bene a me:

 

tu si’ «Lucia»:  senza sti duje cugnomme.

senza ‘sta filastrocca

ca i’  scasso quanno vaso chesta vocca:

levo ‘o ssupierchio, e resto sulo ‘o nomme.

 

Sena ‘e cugnomme, senza

‘o «donna» ca te do’ pe’ cunvenienza,

io te chiammo «Lucia !»...

E tanno si’ d’ ‘a mia, tutta d’ ‘a mia !

                                                                    E. A. MARIO