O vernecale

 

Tutta ‘a furtuna, chillu princepale

d‘ ‘o vico ‘e tutt’  ‘e  sante - cummincianno

a solde  ‘e spiccio, e sempe faticanno –

s’ ‘a facette cu chillu vernecale:

 

na ciòtola ‘e lignamme, tale e quale

a na vasca addo’  ‘e ggocce d’acqua vanno

cuntinuamente dinto, fino a quanno

se vede chiena chiena, eguale  eguale...

 

-«Nu soldo ‘e chest !» «Ri’cient’  ‘e chell’ato !»

E addo’ cchiù miette, certo, cchiù ce truove.

E  i’,  guagliunciéllo, stevo llà ncantato

 

pe’ guardà, mmiezo a chella massa scura,

cierti centesemiélle nuove nuove

ca parevano d’oro adderettura !

                                                       E. A. MARIO