’O TORO

 

‘O toro è ‘o cchiù guappo d’ ‘e guappe

p’ ‘a forza ca tene,  e ‘sta forza

putente se vede da ‘e  fforme

ca pareno ‘e màrmule o ‘e bronzo.

 

Si dint’ ‘a scampìa passa ‘o toro

e ‘o  vedono ll’ate animale,

‘o scanzano, e ogne ommo addeventa

nu pizzeco, fosse ‘o cchiù forte.

 

Ma vìdelo dint’ ‘o maciello,

addà sta ‘o bucciere, ca è comme

si fosse ‘o destino pe’ nuje !

 

E basta na scannaturata

pe’ di’  a  tuttequante ca ‘o toro

e  ‘o  piécoro  so’  tale e quale !

                                               E. A. MARIO