O piro fùceto

 

Nu piro nun faceva pére maje,

e pecchesto ‘o patrone s’ ‘o vennette.

Nu fabbricante ‘e statue, ca ‘o vedette

massiccio, llà pè llà se ll’accattaje:

 

ne facette nu Cristo bello assaje

p’ ‘a Cchiesia-madre. E int’ a ‘ sta cchiesia jette

proprio ‘o patrone ‘e ll’albero: trasette

pe’ na grazia, pecchè steva int’ ‘e guaje:

 

p’ascì ‘a sti guaje, pregaje cu’ fede ardente,

ce refunnette làcreme e preghiere...

Ma nu juorno, stracquato finalmente,

 

parlaje ntuosto !  Dicett: -«Scemo ‘e me !

Quanno ire pire, nun facive pére:

comme ‘a putevo avé ‘sta grazia ‘a te ?»

                                           E. A. MARIO