’E vase d’ajére...

 

Ma quanta vase t’aggiu date ajére ?

P’ ‘e ccuntà, ce vurriano cchiù ‘e diece ore.

E poco o niente fa nu cuntatore

si ‘e vase so sullécite e sincere:

 

vase se ponno dà ‘e tanta manere,

e cierti vase so’ senza sapore;

ma, quann’uno ce mette ànema e core,

che sapore,  e che ardore,  e che piacere !

 

Mmésca ‘e zucchero e rose...Mmésca  ‘e freva

d’ammore e squisitezza  ‘e  sentimento...

E  a  vasà se fa ‘e pressa, se va  ‘e lèva...

 

senza perdere n’attimo... E chi  ‘e cconta

chilli vase ? Chi ‘e cconta ‘e ppezze ‘argiento

ca mena a mare ‘a  luna quanno sponta ?

                                                                  E. A. MARIO