‘E RILORGE


Mme ncanto a guardà ‘ a putechella

d’ ‘o rilurgiaro ca sacc’io:

è chiena ‘e rilorge: rilorge

ca ‘o rilurgiaro ’e  ffa tutte isso.

 

Cu’ molle, rutelle, rubine

e tutt’o riesto, nu cungegno

passato p’ ‘e mmane ‘e chill’ommo

acquista forma e cunsistenza.

 

E chilli rilorge isso ‘e vvenne

pe’ bia ca spàccano ‘o minuto.

Insomma, so’ tutte precise !

So’ asciute, insomma, ‘a chelli mmane !

 

Io guardo a chill’ommo, ca tene

‘a barba longa ‘e nu profeta,

e pare ch’è asciuto ‘a na Bibbia

ca tene ‘e ppaggine illustrate:

 

‘e vvote, perciò, mm’ ‘o figuro

cu’ nu triangolo int’ ‘e cchiocche,

e, mmiezo, nu ciuffo ‘e capille

ca pare ‘a fiamma  ‘e  S. Bicienzo.

 

E, quanno sta tutto applicato

a fa’ rilorge, arrassumiglia

a ‘o viecchio ca fanno ‘e pitture

raffiguranno ‘o Pateterno.

 

Pecchè ?  Nuje che simmo a stu munno ?

Simmo rilorge, tale e quale !

Ce ha fatte una mano, e po’, doppo,

ce ha dato corda a ognuno ‘e nuje.

 

E nuje, comm’infatte, sentimmo

‘o tticche-tacco ca fa ‘o core:

po’, quanno – ttà ! – ‘a corda se spezza,

ll’ommo addeventa na carcassa.

 

Eggià ! Pecchè l’ommo, ch’è ‘o vero

capolavoro d’ ‘a natura,

fa ‘a fine d’ ‘e capolavore

ca sape fa’ stu rilurgiario...

 

Pur’ isso ‘e ffa belle e precise,

ma, quanno sona miezujuorno

- songo uòmmene o songo rilorge ? -

nun vanno maje tutte d’accordo !

                                                            E. A. MARIO