DONNA CRESTINA. . .

 

Quanno cacciate st’ ànnese,

pare ca stammo int’ ‘o salotto aunite

pe’ fa’ nu pucurillo ‘e tettattè:

 

vuje site accussì amabile,

e, pe’ st’attenziuncella ca facite,

i’ mme sento felice comm’a che...

 

Ma i’ penzo: “Che delizia

si stéssemo nuje sule overamente

addò nisciuno ce putrìa vedè !”

 

‘O ppenzo, e ‘o desiderio

ca nun me dà cchiù pace se fa ardente,

pecchè ‘o core cchiù àve e cchiù vo’ avé...

 

E vuje cacciate ll’ ànnese...

Ll’ ànnese se surzéa stanno vicine:

vicine, quacche cosa s’hadda di’...

 

E i’ mme ne faccio brindese:

p’ ‘o brindese tuzzammo ‘e biccherine,

e ce affamuliammo a fa’ accussì...

 

...Onna Crestì, crediteme:

quann’io ve lasso, parlo sempe ‘e vuje,

e quanno parlo ‘e vuje nun so’ cchiù i’ !

... E ghiammo !   E deciditeve !

All’età ca tenimmo ‘o tiempo fuje,

e ‘o llassato è perduto, onna Crestì !

 

                                                    E. A. MARIO