CUNTO ANTICO

 

«Ce steva na vota...» «Ce steva...»

Ma ‘o cunto mme ll’aggio scurdato:

nu cunto ca ‘a nonna ogne tanto

cuntava, quann’ero guaglione...

 

Stu cunto parlava ‘e nu tale

ca niente teneva e ca tutto

vuleva, e perciò se sunnava

‘e ccose ca s’hanno int’ ‘e suonne:

 

ciardine ncantate, uorte e prate

cu’ ll’albere càrreche ‘e frutte

maje viste, terreno addò chello

ca miette ce ‘o ttruove ncriscenza.

 

Furtuna ca ‘a trova chi ‘a cerca.

Perciò, che se mette ncammino

‘o ssape ca a ll’ultimo ‘o premio

nun manca. E cammina cuntento.

 

Tu suoffre ?  Ma a ll’ultimo guode !

Tu truove p’ ‘è vvie sfussecate

pantane ca sporcano ? prete

ca fanno ascì ‘o sango da ‘e piede ?

 

Ccà e llà, truove ‘o ffilo-spinato

ca nguerra ‘o suldato tagliava

cu’ e ffòrbice pe’ se fa’ a strata

cchiù libbera ‘o juorno ‘e ll’attacco ?

 

Ccà e llà, truove sciumme e muntagne

ca diceno: -Férmate ! E invece

già ‘o ssaje comm’ ‘a cosa fernesce

e vaje senza n’ombra ‘e paura !

 

«ce steva...  ce steva...»  Ma ‘e ccose

ca tanno restavano impresse,

po’,  fùino scassate da ‘o tiempo:

parevano scritte cu’ ‘o ggesso...

 

Eppure era bello stu cunto...

Guaglione, che gioja ca mme deva !

Peccato ca nun mm’ ‘o ricordo

Pe’ dà gioja a ll’ate pur’io !

                                                          E. A. MARIO