Chello ca mme succede

 

Mme tene mente ‘a gente quann’ ì’ scrivo

sunette dint’ ‘e tramme e dint’ ‘e trene.

Forse penza: «Chisà che male tene ! 

Chisà pecchè sta cupo e apprennetivo ! ».

 

Cierti vvote,  pe’ scrivere,  mme privo

d’ ‘o mmangià  e d’ ‘o ddurmì, pecchè mme vene

ll’estro...  E stu cerviello chi ‘o  mantene

si corre appriesso a ‘e rrimme pe’ currivo ?

 

Quanta pietanze, ahimè,  se so’ ngessate !

E tant’appuntamente - ‘e cchiù mpurtante –

pe’ nu sunetto mme ll’aggio scurdate.

 

E ‘a gente ride:  ride,  e mme ncujeta !

E  mme chiammano pazzo tante e tante...

Essì,  so’ pazzo, pecchè so’ pueta !

                                                                                                E. A. MARIO