Ajere...

Ogge, dicimmo: «Ajére»

Ricurdànnoce ancora na jurnata

Ca è stata tantu bella, ma è passata.

Dimane, invece, pè ce ‘a ricurdà,

avimm’ ‘a di: «Ll’atriere»...

E po’, doppo dimane,

addeventa na data

fatta pe’ ricurdà cose luntane...

 

E sta jurnata era luntana quanno,

spartute, ll’aspettàimo suspiranno:

lettere ncopp’a lettere,

cartuline illustrate, telegramme:

ddoje passione, ddoje fiamme

comm’a chelle ca ‘o viento,

sciuscianno, cchiù ‘e ffa  crescere, p’’e spartere

e pe’ ll’avvicinà quacche mumento.

 

Tu, sola !  Io, sulo ! E quante,

ma quanta miglia ‘e strata mmiezo a nuje,

mmiezo a sti core amante

fedele tutt’ ‘e dduje,

tutt’ ‘e dduje ustinata a vulè bene

sapenno certo ca ogne tiempo vene:

ca dopp’ ‘o purgatrio, all’impruvviso,

s’arape ‘o paraviso...

 

Porte d’ ‘ò paraviso,

v’arapiesteve ajére: ‘o pizzo a riso

‘e chella ca ‘a luntano accumparette,

doppo dduje mise ‘e pene, v’arapette...

Justa dicennove ore

Vocca a vocca, a core a core...

Pe’ nun sentì e pe’ nun vedè cchiù gente,

na stanza a ‘o quarto piano, àuta e lucente !

 

Ajére fuje ‘sta bella

Jurnata ‘e gioia ! E n’ata comm’a chella,

o priesto o tarde, certo venarrà.

Giacchè ‘o destino ce ne dà ‘o permesso,

nun ce avimm’ ‘a lagnà !

Viato a chi, doppo ‘e ttempeste nere

pò di’: «Dimane, è festa !» E, ‘o juorno appriesso,

pò di’: «Che bella festa è stata ajére !»

 

                                     E. A. MARIO